Urimet
Urime per festat
Fitër Bajrami dhe Kurban Bajrami, janë festa të islamit. Zoti i ka lidhur festat në islam, me rituale dhe adhurime madhore. Kështu, Ai e ka lidhur festën e Fitër bajramit, me agjërimin e muajit të Ramazanit ndërsa Kurban Bajramin me kryerjen e Haxhit.
Festat e myslimanëve lidhen me dy dimensione madhore, njëri hyjnor kurse tjetri njerëzor. Dimensioni hyjnor, është fakti se njeriu, edhe pse në festë, nuk e harron Zotin e tij por përkundrazi, ai e madhëron dhe falënderon Atë në çdo rast. Festa nuk është moment shpërthimi për të përmbushur të gjitha epshet dhe pasionet, por është festë e cila fillon me madhërim të Zotit, lutje dhe afrim me Zotin. Të festosh nuk do të thotë të çlirohesh nga adhurimet, ritualet dhe bindja ndaj Zotit, për të bërë ç’të të dojë qejfi.
Sakaq, dimensioni njerëzor i festës është në gëzimin, dëfrimin, harenë, lojën, këngën, veshjet e reja, komunikimin dhe festimin me të tjerët etj…
Pikërisht për këtë, islami e ka obliguar besimtarin që gjatë fitër bajramit, të japë zekatin e fitrit. Profeti a.s e ka bërë obligim këtë taksë për të rriturit dhe të vegjlit, për burrat dhe gratë. Ajo është një formë pastrimi për agjëruesit nga të metat e mundshme që mund ti kenë shoqëruar gjatë agjërimit, por është dhe ushqim për fukarenjtë. “I furnizoni që të mos lypin sot!” u thoshte Profeti a.s myslimanëve. Kështu, në vend që fukarenjtë të sillen rreth e rrotull duke lypur, shko ti tek ai dhe jepja zekatin pa ta kërkuar. Gëzoje këtë ditë ashtu siç gëzon edhe ti. Festa nuk është e kufizuar vetëm për ata që kanë mundësi ekonomike, por është edhe për të vobektët dhe hallexhinjtë. Nëse i varfëri i sheh fëmijët e tjerë të veshur mirë, ndërkohë që fëmijët e tij janë veshur me rrecka, kjo festë dhe ky gëzim i ngec në fyt. E si mund të gëzojë, nëse fukarai i sheh të tjerët teksa blejnë dhe ushqehen me gjëra të mira, ndërkohë që ai vetë nuk ka asgjë për të shuar urinë. Në raste të tilla, festa shndërrohet në stres dhe vuajtje. Prandaj dhe islami ka sanksionuar sadakanë e fitrit dhe kurban bajramin, me qëllim që edhe fukarenjtë të gëzojnë. Pra festat në islam janë si për të pasurit ashtu edhe për të varfrit, si për të rriturit ashtu edhe për të vegjlit, si për burrat ashtu edhe për gratë.
Islami si fe hyjnore nuk është fe e sikletit dhe shtrëngimit, por fe e cila përkon me natyrën njerëzore dhe natyra njerëzore e pëlqen argëtimin dhe gëzimin, sidomos në raste festash duke përfshirë të gjithë.
Ju urojmë të gjithë shqiptarëve në Gjermani dhe myslimanët anë e mbanë botës, Gëzuar festën e Fitër Bajramit. Zoti e bëftë këtë ditë, pikënisje të çdo të mire!
Me respekt:
UIAZD
Të nderuar vëllezër besimtarë!
Ramazani që fillimi i tij është mëshirë, mesi i tij falje e fundi i tij shpëtim po na jep lamtumirën e fundit për këtë vit.
Për shkak të pandemisë, ky ishte Ramazani i dytë që e kaluam ndryshe por gjithsesi me vete kishte patur sjellë plot mirësi. Për shkak të pandemisë në disa xhami nuk u fal teravija apo në disa të tjera u shkurtua ky namaz i begatë ndërkohë që mukabelet u realizuan online. Por ky muaj i begatë edhe në kohë krize mundësoi pastrimin e shpirtit, ngritjen e moralit, tubimin e vitrave, shpalosjen e solidaritet e vëllazërisë mes myslimanëve.
Këtë Ramazan u sulmuan besimtarët mysliman që faleshin dhe u përdhos xhamia Aksa, e cila është xhamia e tretë e shenjtë për myslimanët, kibla jonë e parë dhe djepi i të gjithë feve dhe besimeve monoteiste, e si i tillë duhet të jetë vend i bashkëjetesës dhe mirëkuptimit.
Shpresoj dhe uroj që ky Bajram që po troket, të sjellë paqe në Jeruzalem e kudo në botë!
O Zot të lutemi nga thellësia e zemrës të na e kesh pranuar agjërimin dhe çdo vepër tonën dhe të kërkojmë falje për çdo mangësi e gabim!
O Zot! Ndihmën Tënde kërkojmë që të përkushtohemi ndaj Teje në 11 muajt në vijim dhe Ty të lutemi që e gjithë jeta jonë të jetë Ramazan dhe ndarja nga kjo botë të jetë për ne Bajram!
Për shumë vjet gëzuar Fitër-Bajramin!
Me respekt:
Mensur ef. Halili
Mirë se vjen o Ramazan!
Të nderuar vëllezër dhe motra!
Si çdo vit po na troket muaji i bekuar i Ramazanit për të reflektuar e përmirësuar vetveten, familjen, shoqërinë e mbarë botën! Edhe pse jemi në ditën e fundit të muajit Shaban, kemi filluar të ndiejmë aromën e këndshme të musafirit qiellor që do na flladisë me mirësitë e tij të panumërta.
Por ky Ramazan sikur vitin e kaluar po na gjen në një gjëndje të jashtëzakonshme. Ne si muslimanë kemi trashëguar kulturën e Profetit a.s në mikpritjen e musafirëve të bekuar qoftë edhe në të tilla situata.
Nga ky Ramazan 2021 po na ndan Nijeti dhe plani i shfrytëzimit të tij kështu që le të jetë motoja jonë në këtë muaj:” O Allah, unë do zbuloj një faqe të re tek vetvetja që nuk e njihja më para dhe do të adhuroj Ty, o Allah si asnjëherë më parë!”
Me këto ndjenja dhe emocione na bëjnë ta shijojmë Ramazanin si një lindje e re për vetvetet tona pasi ky muaj është muaji i pastrimit, i ndryshimit, i zhvillimit dhe i përparimit. Me adhurimet tona gjatë natës dhe ditës do zbukurojmë jetën tonë e do stilisim mbarë shoqërinë.
Shoqëria muslimanë buron nga familja dhe le të shfrytëzohet kjo situatë e krijuar duke iu dedikuar familjes. Ndoshta neve nuk na pëlqejnë disa gjëra, pasi jemi mallëngjyer për namazin e Teravisë, Iftaret e përbashkëta e vizitat e ndërsjellta, por Allahu ka urtësinë e Tij në gjithçka, kështu që angazhimi maksimal me familjen gjatë këtij muaji mbetet prioritet i muslimanëve për të arritur synimin final të Ramazanit, siç na mëson Allahu në Kuran:” O ju që keni besuar, iu është bërë obligim agjërimi ashtu siç ishte për ata para jush, që të bëheni të devotshëm.” 2/183
Duke shpresuar nga Allahu që të na i lehtësojë adhurimet gjatë muajit Ramazan e në veçantë agjërim, me shpresë që ditën e Gjykimit të ftohemi në xhenet nga dera Rejan!
Amin!
Me respekt:
UIAZD
Selam alejkum
Të dashur vëllezër besimtarë!
Në këto ditë festive edhe pse në kushte të jashtëzakonshme, ju përcjellim urimet tona më të sinqerta për lumturi, sukses e mirësi në jetë dhe familjet tuaja. Me lutje e shpresë për ditë më të mira për kombin tonë dhe mbarë njerëzimin!
Festat tona dhe në veçanti Kurban Bajrami janë burim frymëzimi dhe force për të gjithë bashkëkombësit dhe të gjithë besimtarët kudo që janë, për më shumë solidaritet dhe paqe, vepra humane dhe sakrificë në shërbim të së mirës dhe të drejtës. Veçanërisht i përulemi Allahut kësaj radhe që të përfitojmë urtësi nga planet e Tij hyjnore ndaj njerëzimit.
I lutemi Zotit të Gjithëfuqishëm që të largojë nga njerëzimi këtë pandemi sa më shpejt!
I lutemi Zoti fuqiplotë me përulje, që drita e besimit dhe begatia e kësaj feste të na shoqëroje kurdoherë në jetë!
Me respekt:
Mensur ef. Halili
Esselamu alejkum
Të nderuar vëllezër besimtar,
Unioni i qendrave Islame Shqiptare në Gjermani i uron të gjithë shqiptarët në Gjermani, në mbarë trojet e tyre etnike, por dhe mbarë myslimanët anembanë botës:
“Gëzuar për shumë vjet festën e madhe të Kurban Bajramit!”
Zoti ynë thotë në Kuranin fisnik: “..dhe dijeni se tek Zoti nuk shkon as mishi e as gjaku i kurbanit, por tek Zoti arrin devotshmëria juaj, prandaj Zoti ua nënshtroi kafshët që të falënderoni dhe lartësoni emrin e Tij për çka ju ka drejtuar dhe përgëzoji bamirësit”.
Të bësh kurban, do të thotë të fusësh gëzim në familjen tënde, t`i gëzosh fëmijët e tu dhe ta dinë edhe ata se ç`do të thotë dashuri për Zotin, do të thotë të fusësh gëzim tek njerëzit e tu të afërm, tek komshinjtë e tu dhe tek fukarenjtë, të cilët presin se kush do t`i shikojë ditën e Bajramit. Kurbani që bën, është shenjë falenderimi ndaj Allahut (xh.sh), i Cili të ka dhënë shumë dhe kërkon pak. Pasha Zotin, Ai nuk ka nevojë as për mishin e as për gjakun e kurbanit, por tek Zoti shkon vetëm bindja jonë ndaj Tij.
Po ashtu i urojmë të gjithë Haxhijve Haxh dhe adhurime të pranuara!
Zoti ua pranoftë punët tuaja të mira! Gëzuar dhe çdo bajram u gjetë më mirë se tjetri! Zoti e bëftë Bajramin festë në zemrat tona, festë në shtëpitë tona, festë për popullin tonë. I lutemi Allahut (xh.sh), që viti që do të vijë, të na gjejë më afër me Allahun (xh.sh), më afër me shpirtin tonë, më afër me njëri – tjetrin, më larg shejtanit të mallkuar, më larg stresit dhe problemeve. Zoti e bëftë këtë bajram mirësi dhe bekim për mbarë umetin islam!
Me shumë selame dhe respekt: Kryesia e UIAZD-së
[metaslider id=399]